tgoop.com/trupkirezgari/14019
Last Update:
سوورە كانیاوی «هەلاوان» هێشتا؟
خوێن و ئەسرینی لە چاوان هێشتا؟
*
ماوە لێی «ئاشی گوڵان» بەرداشی؟
سەری جاشان بكەمە باراشی
ئاشەوانی بە ورەی ئەم ناوە
ئاشی بە خوێنی نەیار گێڕاوە
*
«پاشبڵاخ» باخی بەهەشتی دنیای
داخەكەم جەردە تورك ناوی نای
تۆ دەبوو ناوت ئەوین‌ئاوا با
دڵەكەت كانیی حەز و هیوا با
²
تەرەغە! سەر بەتەمی، دڵ بە خوێن
سینە برژاوی، سەر و ڕوو بژوێن
دڵپڕی دەستەیەكی خۆخۆری
گەرچی جێژوانی دڵی پڕ شۆری
ئەو دڕ و ڕق‌لەزگانە كورد نین
ڕۆحی كورد دوورە لە تاڵان و بڕین
دڵی كورد كانی ئەوینە و جوانی
وەك سەرت بەرزە ورە و ویژدانی
تاقمێكن كە دڕ و ژاراوین
بێ بەزە و یانیگر و قیناوین
توخمی تورك و عەرەبن جێماون
ئاشقی خوێن و گڕ و شاڵاون
بۆ نەیار هێندە بە دڵ داهاتن
تاكوو حیزانە بە چۆكدا هاتن
چوونە كڕنۆشێ لەبەر پێی دوژمن
ئافەرینێ سەری تێدا بردن
گایە بوون عەشقی نەقیزە و خەرەزەنگ
تەپ و گوێ فیچ و خەساو، گێل و دەبەنگ
جەرگی دایكی خۆی ئەكێڵا بۆیان
بوو بە دەسكی چەقۆ شاخی خۆیان
بەو چەقۆیە هەموو سەریان دەبڕا
ورگ و جەرگ و دڵی سڕیان دەدڕا
هێندە مەست بوونە بە چێژی جاشی
هەر دژێ بێ دەبنە وێڵداشی
خاكی خۆیان دەكەنە مۆڵ بۆیان
دەمڕن وەك سەگی كرمۆڵ بۆیان
لە دەس ئەو دەستە دڵم بێزراوە
ڕۆحی هەستم بە كەسەر خنكاوە
خۆزگە بێ شاعیری پیری «كۆكە»م[6]
ویش بسووتێ بە خەمی ئەمڕۆكەم
وەكوو ئەودەم گەلی خۆخۆر ماوە
جێگە سمكۆڵ و شەڕ و شۆر ماوە
گڕپژی واژە بە سەریاندا كا
خەنجەری خامە لە دڵیان ڕاكا
²
تەرەغە! ناخی بەسۆم گڕکانە
دڵ قەمۆچکەی گڕە، گڕ بارانە
شەوە تاریکە دڵم گیراوە
شەوەزەنگ قامکی لە چاوم ناوە
شەو کڕە باڵی ڕەشی بێ سێبەر
لە خەوان گوند و مرۆڤ و دێبەر
چڵکنێکی قزە، بێ جەرگ و زۆڵ
خۆی مەڵاس داوە لە نێو چاڵوچۆڵ
بۆ قومێ چڵپە خەریکی ڕاوە
داوی بۆ باز و هەڵۆ داناوە
نیوە شەو نێرە هەڵۆی شاخ و کێو[7]
داگەڕا ڕوو بە چەم و گوند و نشێو
چوونە کڕنۆش لەبەری ئاو و زەوی
بۆێ نەوی کرد سەری، هەوراز و نەوی
خاک کە هەنگاوی دەکرد ماچ باران
ئاو دەمی پێوە دەنا و دەیتاران
نەیدەویست خۆڵی لە سۆلی نیشێ
تۆز لەسەر پێوقەدەمی هەڵنیشێ
هێشتە تێر ماچ نەببوون خۆڵ و بەرد
ئۆقرە بگرن بە شەقاوی کووهگەرد
هاتبوو ماڵی دڵی دێ ڕوون کا
تیری چڵکن دڵی مانگی پێکا
تیری چڵکن کە بە ڕووناکی وەڕی
دێ شکا پشتی، هەیڤ ڕەنگی پەڕی
تەمی لێ نیشت سەری«ئاسمان بڵاخی»
ڕەش پەڕی هەورێ بووە بەیداخی
دەستی نا سەر دڵی «شیلاناوی»
ماچی کرد چاوی ئەسر تێزاوی
دەشت و گرد و چەمی ئەم مەڵبەندە
پاکی خەمبار و کز و دڵمەندە
خەم زنەی خوێنی لە چەم پێ ڕشتوون
یارە کێوگەردەکەیان جێی هێشتوون
گوڵ بە شاباڵی پەپوولان دەفڕن
ڕێی چیا و دەشت و بیابان دەبڕن
بۆ بەهاری دڵی نووستووی دەگەڕێن
بۆ گڵی گۆڕی بزر بووی دەگەڕێن
تاکوو باوەش لە گڵی وەربێنن
ڕۆحی شەیدا و لە کوڵی بدوێنن
لەوێ شین ببنەوە سەر هەڵبێنن
ڕەگی خۆیان لە دڵی هاڵێنن
با لە ئاڵای گەشی کوردوستانێ
تێر بە چاوانی ئەوان بڕوانێ
هەڵمژێ بۆنی شنەی ئازادی
داگرێ ڕۆحی، موچڕکی شادی
«شاخی شێخ هەمزە» لە « قاقڵاوا»وە
گڕی تۆڵەی لە دڵا ڕسکاوە
خڕ و دۆڵی زنەیە، خوێناوە
خوێنی کووهگەردە پەڵەی پێداوە
سەری نا سەر دڵی«دووبرا کووژراو»
پێک گەیین ئەشک و دڵی هەڵقرچاو
دەستی هاواری دەکێشێ بۆ لات
چاوەڕێیە دڵی کەیلی «ئاوات»
دەڵێ سەر هەڵبڕە لێم قەوماوە
کێو و کەژ بێ کەس و بێ خێو ماوە
شەوە پێپەستی پەژارە و دەردم
خوێنی پڕژاندە بنار کووهگەردم
مانگی ئەم شەو لە قەفەسدا دیلە
گوێی لە قاسپەی کەوەکەی «زەنبیل»ە[8]
پێت دەڵێ: پشت و پەنای کێوانم!
دڵ شکاوم لە دڵت میوانم
تۆ مەکۆی تیشک و تریفە و نووری
ژوانی سەد کۆڵنەدەری ڕووسووری
سنگی تۆ سەنگەری«چرچە» و «خدر»ن
ئەو برووسکانە کە وەک تۆ نەمرن
پەڵە هەورێ ئەگە هات بۆ ئێرە
ڕێژنەیەک خوێنی دەیە و بینێرە
دەمەوێ لێرە چرای ڕۆژ هەڵکەم
خوێنی کووهگەرد و خدر تێکەڵ کەم
با دەنووک سوور بێ مەلی تەرت و گەوان
با لە قاسپەی نەکەون قاسپە خاسەکەوان
سوور دەکەم پێی پەڕ و دەندووکی شێعر
با هەتاو بڕژێ لە نەینووکی شێعر
با چیا وەک دڵی «ئاوات» گەش بن
خاسە کەو خاوەنی شاخ و کەژ بن
ئەو کڕووزەی کە لە «زەنبیل»ەوە دێ
لە دڵی لەت لەتی «کامیل»ەوە دێ
ڕۆحی تێکەڵ شنەیە و سەوزایی
لە دڵی دەتکێ وشەی دەریایی
هەر وشێکی گەشی، لافاوێکە
خوێن و کسپەی دڵە سووتاوێکە
پێت دەڵێ: ئەی تەرەغەی دڵ خەمبار
کۆنە جێژوانی وشەی سەوزی هەژار
بۆ سڕ و دوورە پەرێز وەستاوی؟
سەر بە هەش ماوی کڕ و داماوی؟
تەرەغە دەستی من و داوێنت
تۆ سەری بەرز و دڵی خاوێنت
بگە فریای دڵەکەی سووتاوم
وەرە هانای سەری گڕ تێزاوم
²
تەرەغە! كانی ئەوین و جوانی
@trupkirezgari
BY دێرینە شێعری کوردی
Share with your friend now:
tgoop.com/trupkirezgari/14019