tgoop.com/yurist_imomniyozov/1216
Last Update:
#ishdanboshatish
Kuni kecha Namangan davlat texnika universitetini tashkil etish boʻyicha Oʻzbekiston Respublikasi Prezidentining 23-son qarori kuchga kirdi.
Uning 1-bandida ushbu universitet Namangan muhandislik-texnologiya instituti, Namangan muhandislik-qurilish instituti, Namangan toʻqimachilik sanoat instituti negizida tashkil etilishi belgilangan.
Ushbu qaror 7-bandi b kichik bandi 3-xatboshisida Namangan muhandislik-texnologiya instituti, Namangan muhandislik-qurilish instituti, Namangan toʻqimachilik sanoat institutining huquq va majburiyatlari, shuningdek, tuzilgan shartnomalar boʻyicha Universitet huquqiy voris ekanligi qayd etilgan.
Buni nimaga aytayotganimni tushuntiray.
Qarorga ilovada tasdiqlangan Yoʻl xaritasida universitet faoliyatini tashkil etish muddati etib 2025 yil mart belgilangan.
Demak, shu yaqin kunlarda yuqoridagi 3ta institutda xodimlar bilan tuzilgan mehnat shartnomalari yo institutlarning tugatilishi bilan yoki qisqarish sababli bekor qilinishi boshlanishi mumkin.
Biroq, bu mutlaqo notoʻgʻri boʻladi.
Birinchidan, qarorning oʻzida universitet institutlarga huquqiy voris ekanligi bevosita keltirilgan.
Ikkinchidan, Fuqarolik kodeksining 50-moddasiga muvofiq yuridik shaxslar qoʻshib yuborilganida ulardan har birining huquq va burchlari topshirish hujjatiga muvofiq yangidan vujudga kelgan yuridik shaxsga oʻtadi.
Aynan mana shu qoida yuridik shaxslarga ular qoʻshib yuborish orqali qayta tashkil etilganda oʻzidan avvalgi tashkilotning barcha huquq va majburiyatlari uchun vorislikni zimmasiga olishini ifodalaydi.
Uchinchidan, Mehnat kodeksining 156-moddasida tashkilotning mulkdori almashganda, xuddi shuningdek tashkilot qayta tashkil etilganda (qoʻshib yuborilganda, qoʻshib olinganda, boʻlinganda, ajratib chiqarilganda, oʻzgartirilganda) yakka tartibdagi mehnatga oid munosabatlar xodimning roziligi bilan davom ettirilishi belgilangan.
Yuqoridagilarga koʻra 3ta institutdagi barcha xodimlar bilan tuzilgan mehnat shartnomalari davom ettirilishi kerak. Bunda ularga institutni tugatilishi munosabati bilan ogohlantirish xati berish yoki ishdan boʻshatish notoʻgʻri boʻladi.
Ushbu institutlarda ishlaydigan xodimlar diqqatiga, agar sizlarga ogohlantirish xati berilsa, huquqlaringizni tiklash uchun murojaat qilishingiz mumkin.
➡️ @yurist_imomniyozov
BY Yurist Imomniyozov
Share with your friend now:
tgoop.com/yurist_imomniyozov/1216